Suliarisinnaasagut
Kalaallit Nunaaat pillugu Kalaallit Nunaanniillu paasisimasaqarneq
Kalaallit Nunaat Issittorlu nunarsuarmit tamarmit maluginiarneqarnerulernikuuvoq, taassumalu ersersippaa uagut kalaallit oqaluttuarisaanerput ilisimasavullu nammineerluta paasissutissiarinissaat qanoq pingaaruteqartiginersoq. Pikialami sulinerup tungaatigut misilittakkat aamma inuttut nammineerluta paasisavut tunngavigalugit inuiaqatigiinnut paasinninnerput annertuvoq. Kalaallit Nunaat suliaqarfiginiaraanni paasisaqarfiginiaraannilu inuiaqatigiittut ilusaa, oqaluttuarisaanera, kulturia unammillernartuilu ilisimaarinissaat pingaaruteqarpoq – tamanna misilittagaqarfigilluarparput.
Ukiut ingerlanerini Pikialami Kalaallit Nunaat nunarsualu avataaniittup imminnut paaseqatigiilernissaannik suliaqarnikuuvugut, tassani Kalaallit nunaanni pissutsit piviusut illua tungeriinnilu paasisaqaqatigiinnissaq aallaavigisarlugu. Oqaloqatigiinnerit paaseqatigiinnerillu pitsaanerusumik aalajangiisarnernik kinguneqartarnerat upperaarput, tamannalu inunnut amerlanerusunut iluaqutitaqartarluni.
Ingerlatsinerit pikkorissaanerillu
Ilinniakkatut tunuliaqutigisagut aallaavigalugit ukiorpassuarnilu aqutsisutut assigiinngitsunik suliaqarsimanerput aallaavigalugu suliaqarpugut, ilaatigut Kalaallit Nunaat pillugu saqqummiisinnaalluta suliffeqarfiillu pisariaqartitaat aallaavigalugit ingerlatsinernik suliaqartarluta. Immikkut ukkatarisaraarput periusissiamik piviusunngortitsineq, aqutsineq, attaveqaqatigiinneq kulturillu akornanni suleqatigiinneq.
Periusissianik ineriartortitsineq
Suliffeqarfiit nukittuumik angusassamillu toraagalimmik periusissiorniarneranni Pikialamit siunnersortitut suleqataasinnaavugut. Avataanit isiginnittaaseqarluta suleqataasinnaavugut, takorluukkallu allannguuteqartussamik toraakkanillu angusaqarfiusussamik tigussaasumik pilersaarusiornissaanut sulinissaq ingerlatseqataaffigisinnaallutigu.
Periusissiornermi suliffeqarfiup iluani pissutsit kiisalu suliffeqarfiup suliaqarfigisaani pissutsit piviusut aallaavigalugit suliaqarnissaq uagutsinnut pingaaruteqarpoq. Periusissiaq periarfissanik tikkuussiinnassanngilaq – atoruminartuussaarli, naleqassutsimik pilersitsissalluni ulluinnarnilu sulinermi atuutsinneqassalluni, ilisivimmi toqqorsimaannarani. Uummarissitinneqassaaq atorneqassallunilu.
Peqataatitsineq oqaloqatigiisitsinerlu
Pimoorussisumik oqaloqatigiinneq peqataatitsinerlu Pikialami pingaartilluinnarparput, tamannalu paasinninnermik suleriutsimillu immikkuullarissumik piumasaqarpoq. Suleriutsit assigiinngitsut, soorlu apeqqutinik suliaqarneq, apersuineq, oqaloqatigiinnernik aaqqissuussineq eqimattanillu suleqateqarneq atorlugit peqataatsitsineq annertuumik misilittagaqarfigaarput. Suliffeqarfiup periusissiornermik ineriartortitsinerani annertuunillu allannguutinik suliaqartitsinerani ikorfartuinikkut, taavalu innuttaasut atuisullu misissuiviginerisigut peqataatitsineq qulakkeertarparput. Peqataatitsineq iluatsikkumallugu, peqataasullu tusaaneqarnermik misiginissaat anguniarlugu suliap ataqatigiinnera oqaloqatigiiffissarlu toqqissisimanartoq qulakkeertarparput. Suliami paasiniaavigisassavut eqqortut aamma qulakkeertarpagut. Pikiala suleqatigigukku ileqqorissaarnissamik maleruagassat tamarmik malinneqarnissaat qularissanngilat.
Atuutilersitsineq
Suliffeqarfinni amerlasuuni unammillernartoq annerpaat ilagisarpaat isumassarsiat piviusunngortinnissaat. Suliassat suuneri kiallu suliarissanerai naqissusissallugit ajornanngitsungoorpasikkaluartoq piviusumik ajornakusoortupilussuusinnaasarpoq. Suliffeqarfimmi allannguerusukkaanni ineriartortitserusukkaannilu iliuutsit allanngortinnissat pingaaruteqarpoq – sammiinnarnagit suliaralugilli. Suliffeqarfiit allannguutinik atuutilersitsiniarlutik suliaqarniarnerini Pikialamit siunnersuisutut suleqataasinnaavugut. Uagut nammineerluta ilaatigut Kalaallit Nunaanni aaqqissuussap annerpaap, tassa AWG2016, piviusunngortinneqarnissaa siuttuuffiginikuuarput.
Suliniutinik aqutsineq
Inuiaqatigiinni suliffeqarfinni assigiinngitsuni suliniutit assigiinngitsorpassuit misilittagaqarfigaavut. Suliniutit aallartinnginnerini, pilersaarusiorlualinnginnerini inerneqarluartumillu piviusunngortilinnginnerini ilippanassusaannik missingersuinissamut kingornalu peqqissaarussamik nalilersuinissamut piginnaasat sakkussallu pisariaqartinneqartut pigaavut.
Suliniutinik aqutsinermi misilittagaqarfigisarput annerpaaq tassaavoq AWG2016, tassani suliniummik aqutsinermi suliassat tamakkiisumik akisussaaffigalutigit. Suliniummi suliffeqarfiit pisortanit ingerlanneqartut namminersortunillu pigineqartut, kiisalu inuiaqatigiinni inuit suliniutit aqqutigalugit suleqatigiisinnissaat iluatsittumik ingerlapparput, tamassumalu suliniutinik ingerlatsinissamut ajornakusoortumut paasinninnermik naleqarluinnartumik tatiginartumillu tunivaatigut.
Attaveqaqatigiinneq
Suliffeqarfiit tamarmik attaveqaqatigiinnermik annertuumik pisariaqartitsipput, tamannalu suliffeqarfiup iluani suliffeqarfiullu avataanut attaveqarnermi atuuppoq. Suliffeqarfiit iluatitsilluarnissaannut attaveqaqatigiilluarneq aamma aqqutaasinnaavoq. Attaveqarneq pitsaasoq pitsaasumik anguniagaqartuussaaq, oqariartuutigisarlu ersarissuussalluni.
Pikialami suliffeqarfiit peqatigiiffiillu attaveqaqatigiinnermik suliassaanni siunnersorsinnaavagut, soorlu attaveqaqatigiinnermik periusissiornissaannik suliaqassullugit. Arnakkuluk Jo Kleist attaveqaqatigiinneq pillugu qaffasissumik ilinniagaqarpoq suliffeqarfinnilu assigiinngitsuni aqutsisutut pisortatullu attaveqaqatigiinneq akisussaaffiginikuullugu.
Misissueqqissaarneq nalilersuinerlu
Suliffeqarfiit ilaannikkut erinitsassimaarsinnaasarput, iliuuseqannginnermilu ajornartorsiutip pingaarnersaanik paasisaqarniaraanni misissueqqissaarnissaq pisariaqartoq qaangiinnarlugu. Pikialami isiginnittaatsit arlallit atorlugit unammillernartunik misissueqqissaarneq ilinniagaraarput misilittagaqarfigalugulu, kiisalu annertussutsimik pitsaassutsimillu misissueqqissaarnerit piginnaasaqarfigalutigit. Pissutsit arlallit sukumiisumik misissueqqissaarnissamik pisariaqartitsisinnaapput, tamassuminngalu suliffeqarfissi ikorfartorsinnaavarput.
Suliniut ingerlanneqarnikuugaangat naammassigaangallu nalilersuiviginerani paasineqartarpoq suliniummi anguniagaasut anguneqarsimanersut, misilittakkallu suut pissarsiarineqarsimanersut. Ajoraluartumik sukumiisumik nalilersuineq puiorneqakkajuttarpoq imaluunniit ulapinneq allallu peqqutigalugit pinngitsoortinneqartarluni. Pikiala tassani ikiuussinnaavoq, pilersaarusiukkamik nalilersuinikkut ilinniarfiusimasut pingaarnerit inernerusullu ersersillugit.
Najoqqutassiamik ineriartortitsineq
Isumassarsiap suliareqqinnissaani najoqqutassiallu ineriartortinnissaani Pikiala siunnersueqataasinnaavoq. Inuussutissarsiornerup silarsuaani suliniutinilu misilittagarpassuatta siunnersueqatigiinnissamut piukkunnarsarpaatigut, tassani pilersaarutit angusaqarluartussat inerisarnissaanik isumassarsioqatigiissinnaalluta, isumassarsiallu piviusunngortinnissaannut tutsuiginassusaat unammillersinnaallutigit. Najoqqutassiamik ineriartortitsinermi pineqartut suliamut naleqquttut ingerlatsinermi peqataatinnissaat misilittagaqarfigilluarparput.
Coaching
Maliina Abelsen coachitut ilinniagaqarpoq, ukiorpassuarnilu aqqutissiuinermi aqutsisutut misilittagaqarfigalugu. Toqqissisimanartumik tatiginartumillu avatangiiseqarluni siunnersueqatigiinnermik aqqutissiuinermillu neqeroorsinnaavoq. Taassuma saniatigut mindfulnessimik yogamillu ilitsersuisutut ilinniarsimasuuvoq, tamannalu suliffimmi nalerisimaarnissamut tunngasunik suliaqarnissamik periarfissiilluni. Maliina ukiut 20-it sinnerlugit yogami ilitsersuisareerpoq fitness-imilu sungiusaasutut aamma ilinniarsimasuulluni.